Судот во Франкфурт ја отфрлил кривичната пријава за осомничен за тероризам затоа што „бил зафатен со други обврски“ објави денеска германското јавно обвинителство.
Портпаролката на обвинителството Фредерике Буш изјави дека 32-годишен Сириец во април 2015 година бил обвинет за подготовка на „сериозни акти на насилство против државата“, но оти против него нема да се води процес, јави дописникот на МИА од Берлин.
Судот во Франкфурт сега вели дека е премногу зафатен за да води постапка против Сириецот поради што го отфрлил случајот. За обвинителството причините за отфрлањето на кривичната пријава се несоодветни поради што е поднесена жалба во регионалниот суд во покраината Хесен.
Прес службата на судот во Франкфурт одби да ги потврди наводите на обвинителството и медиумите кои што тврдат дека случајот е отфрлен поради презафатеност.
Осомничениот Сириец е уапсен додека се обидувал да ја напушти Германија на аеродромот во Франкфурт пред две години по што од судот бил задолжен да се јавува во полиција три пати неделно.