Папата Франциско и поглаварот на Руската православна црква, патријархот Кирил следната недела ќе се сретна на Куба, соопшти денеска потпаролот на Ватикан, Федерико Ломбарди.
– Средбата ќе се одржи на 12 февруари, нагласи Ломбарди.
Како што јави Танјуг, ова ќе биде прва средба на еден римски папа и еден руски патријарх во историјата.
Папата Франциско ќе престојува во посета на Мексико од 12 до 18 февруари, но на патот кон Мексико Сити ќе застане во Куба и ќе се состане со патријархот Кирил на аеродромот во Хавана.
Според најавите од Ватикан, за време на средбата папата и патријархот ќе потпишат и заедничка декларација.
Првата средба на поглаварите на Римокатоличката и на Руската православна црква, медиумите ја оценуваат како прв голем чекор кон надминување на речиси илјадагодишниот раскол што датира од поделбата на христијанската црква во 1054 година.