Осумдесет села во цела Македонија можеа да добијат современа амбуланта со медицински персонал со народните пари кои медиумите ги добиле од државата, обвини портпаролот на СДСМ, Петре Шилегов. Тој кажа дека за три години, на сметките на Сител, Канал 5, Алфа, „Република“, „Курир“, „Радио Слободна Македонија“ и Телевизија Нова, медиумите добиле неверојатни 20 милиони евра пари од државата.
– Наместо решавање на проблемите на граѓаните, 20 милиони евра отидоа за пропаганда, нарачани прилози и црни кампањи. 20 милиони евра за медиумите каде што вистински газда и уредник е Никола Груевски, рече Шилегов.
Според Шилегов, со тие 20 милиони евра можеле да се отворат 4 фабрики и да се овозможат најмалку 4 илјади реални работни места, а не виртуелни работни места во фантомски фирми.
Тој вели дека со народните пари дадени на медиумите, државата можела да изгради 15 нови, современи градинки и да се обезбедат соодветни услови за над 3.000 дечиња.
– „Република“ не може да ги оправда милионските приходи ниту да ја демантира поврзаноста со Белизе, даночниот рај на Никола Груевски. Официјалните документи го потврдуваат тоа, рече Шилегов.
На прашање дали ќе се извини на редакцијата на „Република“, Шилегов рече дека ќе разговара, но со вистинскиот сопственик на медиумот, односно оној од Белизе.
Александар Тодески