Кремљ ги отфрли наводите дека рускиот претседател Владимир Путин е корумпиран и оти крие колку е навистина богат, оценувајќи оти тоа е „чиста измислица“.
Обвиненијата на сметка на рускиот претседател ги изрече еден американски претставник во познатата емисија на Би-Би-Си „Панорама“.
Би-Би-Си го избра Адам Зубин, кој во рамки на американскиот Трезор се занимава со тероризам и финансиски криминал како експерт за истрага на приходите на Путин, пишува „Раша тудеј“.
– Путин наведува дека добива годишна плата од околу 110.000 долари. Тоа не е точен износ бидејќи Путин има долгогодишна практика на криење на вистинското богатство, наведе тој.
На прашањето „Дали Путин е корумпиран?“, Зубин одговори: „Според наше мислење, е“.
Зубин наведе и дека „тоа на американската Влада и е многу познато, многу години“, и дека Путин им помогнал на своите пријатели и блиски соработници да се збогатат.
Руската Влада ги отфрли тие наводи. Портпаролот на Путин Дмитриј Песков го демантираше тоа, велејќи дека „не е потребен одговор на ниту едно од овие прашања, бидејќи тие се чиста фикција“.