Високиот претставник на ЕУ за надворешна политика и безбедност, Федерика Могерини, како и еврокомесарите за проширување и соседска политика, Јоханес Хан, и за хуманитарни работи, Христос Стилианидис, заминуваат за Турција, соопшти Европската комисија, пренесува БТА.
Стилианидис веќе за време на викендот ќе се запознае со реализацијата на хуманитарните проекти финансирани од ЕК, а кои се наменети за бегалците од Сирија и Ирак. Могерини и Хан, пак, ќе учествуваат на средбата посветена на дијалогот на високо ниво со Анкара.
Во соопштението не се посочува кои претставници од турска страна ќе учествуваат на средбата во Анкара.
Тројцата еврокомесари ќе разговараат и со претставници на четирите главни партии во Турција и ќе патуваат до југоисточниот дел на земјата.
Предвидено е пратениците на ЕК да се сретнат со турски граѓански организации, како и со претставници на мноштвото етнички и религиозни заедници во регионот.