Едно лице загина во сообраќајна несреќа што се случи ноќеска во Штип во судир меѓу две патнички моторни возила.
Портпаролот на СВР Штип Гордана Панајотова изјави дека несреќата во која загинал 38-годишниот Маријан Ордев, се случила 22 минути по дочекот на Новата година.
– Во критичниот момент патничкото возило „фолксваген поло“ управувано од А.Н. во кое имало и сопатник, се движело во правецот од зградата на Противпожарната единица кон мостот на реката Брегалница, а починатиот возач на возилото „ауди 16“ Маријан Ордев се движел во правец од бензинската пумпа кон градската автобуска станица во Штип при што дошло до судир помеѓу двете возила. Итната медицинска помош веднаш интервенирала, но констатирано е дека 38-годишниот штипјанец загинал на лице место, вели Панајотова.
Во тек е истрага за причините за несреќата на една од најфреквентните сообраќајници во Штип, а алкотестот што го направила полицијата кај возачот А.Н. покажал дека во крвта имал 1,45 промили алкохол.
