„Народниот правобранител со голема загриженост констатира дека повеќе од 1500 бегалци (жени, деца, стари лица и тн.), вчера од 11:00 часот се оставени на отворено во Прифатниот центар „Винојуг“ Гевгелија каде што ја поминаа и ноќта. Причина за нехуманиот третман на бегалците е затворање на двата големи монтажни шатори (поради нивна дезинфекција), како и блокирањето на железничката пруга од страна на такси возилата во знак на револт од Одлуката на Управувачкиот комитет за време на кризни состојби бегалците да се превезуваат првенствено со воз, а само во исклучителни случаи со користење на такси возила.
Народниот правобранител смета дека институциите надлежни за справување со бегалската криза, со ова покажуваат крајно несериозен однос и негрижа за бегалците кои повеќе од 24 часа се надвор изложени на неповолни временски услови.
Народниот правобранител, препорачува итно да се овозможи непречен транспорт на сите бегалци до Прифатниот центар „Табановце“, со користење на сите превозни средства и почитувајќи го правото на избор на превозно средство од страна на бегалците. Истовремено ги повикува надлежните министерства, особено Управувачкиот комитет за време на кризни состојби и Центарот за управување со кризи за итно и неодложно решавање на проблемот со транспортот, како и создавање услови за хуман престој и третман на лицата во Прифатниот центар „Винојуг“ во Гевгелија“, се вели во соопштението на Народниот правобранител.