Британскиот премиер Дејвид Камерон претседаваше денеска со вонредната седница на Владата, посветена на реакцијата на властите на поплавите во северна Англија, за кои истакна дека се без преседан.
– Штотуку претседавав со седница на комитетот КОБРА, посветена на поплавите без преседан. Огромна благодарност до службите за итна реакција и до вооружените сили за големата работа која ја завршија, напиша Камерон на Твитер.
Се очекува подоцна денеска тој да ги посети најтешко погодените области.
– Им изразувам сочувство на настраданите, додаде тој и дополни оти ќе бидат испратени дополнителни војници во погодените региони.
Поројните дождови што изминативе денови ја зафатија северна Англија предизвикаа излевање на реките и поплави во повеќе области и населни места. Британската полиција соопшти дека ова се најголеми поплави во областа Јоркшир во последниве 70 години.