„Општина Центар, од денеска започнува со расчистување на теренот и со уредување на мал плоштад на спојот на улица „Пиринска“ со булеварот „Св. Климент Охридски“.
На местото на несредениот паркинг, оштетен асфалт и подлога и бандери од кои висат кабли, на површина од околу 300 м2, ќе никне пјацета, хортикултурно уредена, со јавно осветлување и нова урбана опрема.
Граѓаните се жалеа на изгледот и состојбата на овој дел од Центар и по контактите и разговорите со градоначалникот и општинските служби, започнува средувањето на просторот.
Ќе се постават клупи, држачи за велосипеди и корпи за отпадоци. Просторот ќе биде поплочен со висококвалитетни плочи од гранит и травертин. Материјалите се карактеризираат со трајност, квалитет и долговечност, лесно се одржуваат и се во склад со најсовремените светски стандарди за партерно уредување.
Веднаш по уредувањето на овој простор, ќе започне и изградба на мал сквер и на улицата “Чедомир Миндеровиќ“, на површина од 250 м2“, се вели во соопштението на Општина Центар.