Џејмс Харден реализира 37 поени во победата на Хјустон на гостувањето кај Детроит со 105:96 во натпревар од НБА одигран вчеравечер.
Харден, кој беше привлечен во составот на крајот од минатата недела од Оклахома Сити со 5-годишен договор за 80 милиони долари, додаде 12 асистенции и 6 скока.
Детроит имаше предност од 83:72 на почетокот на четвртиот дел, но со четири тројки на Карлос Делфино и со силната игра на Харден гостите стигнаа до пресврт. Делфино заврши со 15 поени и 7 скока. Брендон Најт беше лидер на Детроит со 15 поени.
Портланд се справи со гостинскиот тим на Лос Анџелес Лејкерс со 116:106. Никола Батум беше најкорисен за успехот со 26 поени. Демијан Лилард постигна 23 поени и 11 асистенции, а Весли Метјус додаде 22 поени во успехот.
За Лејкерс најкорисен беше Двајт Хауард со 33 поени и 14 скока, а Коби Брајант заврши со 30 поени, но ни тоа не беше доволно.
Индијана дојде до драматичен успех со 90:88 во Торонто по кошот на Џорџ Хил на 2 секунди пред крајот. Дејвид Вест уфрли 14 од 25-те свои поени во четвртиот дел, а Индијана се враќаше од негатива 74:84 во последните шест минути. Кајл Лоури беше лидер кај Канаѓаните со 21 поени.
Сан Антонио ја започна сезоната со победа по успех со 99:95 во Њу Орлеанс. Тим Данкан постигна 24 поени за успехот, а Тони Паркер додаде 23 поени. Број 1 пикот од драфтот, Ентони Дејвис дебитираше во лигата со 21 поен и 7 скока за Њу Орлеанс.
Џамал Крофорд нанижа 29 поени во победата на Лос Анџелес Клиперс дома над Мемфис со 101:92.
Жаоким Ноа беше најдобар со 23 поени и 10 скока за успехот на Чикаго со 93:87 над Сакраменто.
Јута го совлада шампионот од 2011 година Далас со 113:94. По 21 поен за победата реализираа Мо Вилијамс и Марвин Вилијамс.
Средби одиграни вчеравечер во НБА:
Торонто – Индијана – 88:90
Филаделфија – Денвер – 84:75
Детроит – Хјустон – 96:105
Чикаго – Сакраменто – 93:87
Њу Орлеанс – Сан Антонио – 95:99
Јута – Далас – 113:94
Феникс – Голден Стејт – 85:87
ЛА Клиперс – Мемфис – 101:92
Портланд – ЛА Лејкерс – 116:106