Одговарајќи на новинарско прашање за дивоизградената тераса на објектот каде што се наоѓа седиштето на политичката партија ВМРО-ДПМНЕ, градоначалникот на општина Центар, Андреј Жерновски, посочи дека инвеститорот има рок од месец дена сам да ја отстрани дивоградбата, во спротивно, со асистенција на полицијата, тоа ќе го направат инспекциските служби на општина Центар.
„Наш приоритет не е да правиме сцени или да поентираме со тоа. Овој објект не го гледам како партиско седиште и затоа дадовме рок од 30 дена инвеститорот тоа да го направи“, рече Жерновски.
Запрашан за случувањата во ООУ „11-ти Октомври“ и најавите на поранешната директорка, Даниела Костадинова, дека по судски пат ќе бара да се врати како директор во „11-ти Октомври“, Жерновски рече дека зад неа и нејзините постапки јасно е дека стои партијата на власт, бидејќи ВМРО-ДПМНЕ сака да ги држи под контрола и управува 100% од училиштата во Македонија.
„Нас политиката не не’ интересира, туку учениците и квалитетниот образовен процес. Јасно и јас и советниците кажуваме – политиката надвор од училиштата“.