Во борбите во близина на границата со Ирак се убиени двајца турски војници и 15 курдски бунтовници, пренесоа денеска француските медиуми, повикувајќи се на соопштение на турската армија.
Бунтовниците од Курдската работничка партија (ПКК) се убиени во копнената операција на турската армија преземена по вчерашните воздушни напади врз цели на ПКК во реонот на Даглаџа, во округот Хакјари, во југоисточна Турција.
Во соопштението на турската армија, цитирано од француските медиуми, се прецизира дека во вчерашните воздушни напади биле уништени 16 цели на ПКК во реонот на Даглаџа и во планините во северен Ирак.
Турски авиони ловци слични напади извеле и во понеделникот, еден ден по победата на Партијата на правдата и развојот (АКП) на претседателот Реџеп Таип Ердоган на парламентарните избори, потестуваат француските медиуми. Победата и овозможува на АКП да си го поврати парламентарно мнозинство, што го загуби на изборите од 7 јуни.
Претседателот Ердоган денеска вети дека нема да има пауза во борбата против ПКК и операциите против терористичката организација ќе продолжат решително и внатре и надвор од Турција.