До крајот на годината германските власти ќе вратат десетици илјади одбиени баратели на азил од Балканот, најави германскиот министер за внатрешни работи Томас де Мезиер.
Според министерот во наредните недели значително ќе се зголеми бројот на репатријации, доброволни враќања, депортации. Федералната канцеларија за миграција и бегалци има налог до католичкиот Божик да ги одговори сите барања за азил поднесени од баратели од Балканот по што сите одбиени ќе мораат да ја напуштат Германија. Мезиер кој што вели дека овој план мора да се спроведе најави дека посебната контрола на германските граници би можела да трае до средината на јануари.
Од вкупниот број на еден милион имигранти кои што ги очекува Германија до крајот на 2015 година околу 40 отсто доаѓаат од балканските „безбедни земји“ поради што нивните барања за азил се одбиваат, а барателите се депортираат назад. Само годинава германските власти депортирале од земјата 11.000 луѓе, додека 27 илјади сами доброволно се вратиле дома. Најголем број од баратели на азил од безбедните земји се од Албанија (66.311) и од Косово (35. 258). Вкупно околу 580 илјади луѓе од целиот свет годинава побарале азил во Германија.