Мина Андреева, портпаролка на претседателот на Европската комисија Жан-Клод Јункер, денеска во изјава за МИА појасни зошто претседателот на Република Македонија е поканет и ќе присуствува на мини-Самитот посветен на бегалската криза што в недела ќе се одржи во Брисел. Притоа, како што јави дописникот на МИА од Брисел, тaа ги демантираше наводите во дел од македонските медиуми дека, наводно, поканата која била подготвена за премиерот Никола Груевски, наводно била повлечена и истата Јункер ја упатил кон Иванов.
– Претседателот Јункер испрати писмо со покана до господинот Ѓорге Иванов, претседател на БЈР Македонија. Немало „промена”, ниту „замена” на поканата, децидна е гласноговорничката на Јункер во изјава за МИА.
Андреева, исто така додаде дека претседателот на Европската комисија „познава и има професионални работни односи со многу различни политички лидери, како што треба кога сте претседател на Еврокомисијата”.
Таков вид на средба и односи, Јункер имаше и можеше да се забележи во текот на вчерашниоТ ден токму со македонскиот премиер Груевски, во рамки на Конгресот на Европската народна партија (ЕПП) во Мадрид, чиј член е шефот на неформалната Влада на ЕУ, а ВМРО-ДПМНЕ на чело со Никола Груевски се сестринска партија.
