Хари Локвенец, претседател на Комисијата за надзор над работата на УБК и Агенцијата за разузнавање, изјави дека денеска министерот за внатрешни работи, Митко Чавков, не дошол на седницата на Комисијата во термин којшто самиот го предложи.
– Министерот Чавков требаше пред Комисијата за надзор над работата на УБК и Агенцијата за разузнавање да го објасни Акцискиот план на Владата во делот на МВР-како ќе се надминат забелешките наведени од европската експертска група предводени од Прибе. Требаше да ги слушне сугестиите од Комисијата. Непојавувањето на министерот Чавков покажува колку се МВР и Владата несериозни околу надминување на проблемите нотирани од Прибе. Да потсетам, ова се обврски што ќе влијаат на Извештајот на ЕК за напредокот на Р.Македонија. Непојавувањето покажува дека владата и Чавков се плашат од јавна дебата, затоа и пишуваат документи договорени по кабинети, што потоа самите не ги почитуваат – рече Локвенец.
Тој додаде дека очигледно Чавков и Владата бегаат од соочување со прашањето за нелегалното прислушување, посочено во Извештајот на Прибе, дека е дело на домашните служби во УБК.
– Чавков и Владата може да бегаат од комисиска расправа но од одговорноста за незаконското прислушување нема да можат да избегаат, за што е формирано и надлежно Специјалното јавно обвинителство – потсети тој.
