Највлијателната членка на Европската Унија денеска го одбележува денот на кој пред 25 години се обединија Западна и Источна Германија.
Германија се обедини на 3 Октомври 1990 година откако речиси една година порано комунистичката власт во Источна Германија под притисок на масовни демонстрации дозволи минување на граѓаните преку таканаречениот Берлински Ѕид.
Со спроведените уставни и законски реформи преземени од властите во двете Германии на денешен ден пред 25 години Германија стана една држава.
Според германската канцеларка Меркел која е родена во источниот дел од Германија работите по обединувањето се движат во добар правец. И сегашниот претседател на Германија поранешниот свештеник и продемократски активист Јоаким Гаук кој доаѓа од Источна Германија смета дека со обединувањето на двете Германии е корисно и за германските граѓани но и за цела Европа.
Изборот на Меркел и Гаук како источни Германци за водечки луѓе во државата покажува дека Германија ги надминала најголемиот дел од разликите што постоеле како резултат на различното доживување на демократијата во поделената земја. Дел од разликите сепак сеуште постојат. Покрај поголемото ниво на екстремен десничарски активизам и ксенофобија на истокот од земјата разлика има и во бројто на невработените.
И покрај речиси 2 билијарди евра потрошени за подобрување на економската состојба на истокот во овој дел од земјата невработеноста е речиси 9 % додека во западниот дел овој процент е 5,6 %. Податокот дека во 2013 година имало повеќе Германци кои што се преселиле на истокот отколку на западот од земјата покажува дека разликите сепак се многу помали од тие што постоеле пред обединувањето и веднаш по него.