Претседателот на СДСМ, Зоран Заев, денеска се сретна со претставници на Социјалдемократската младина на Финска, коишто се во посета на Р.Македонија.
Централна тема на средбата беше актуелната политичка состојба во Македонија и содржината на договорот од 2-ри јуни/15 јули а се зборуваше и за проблемите со коишто се соочуваат младите во нашата земја.
Претседателот на СДСМ, Зоран Заев, рече дека промените коишто ќе следат на изборите 2016 година, по нормализацијата и демократизацијата на Македонија, ќе ги отвори вратите за економски напредок на земјата и подобрување на животот на сите граѓани, пред се’ на младите.
Заев рече дека само со имплементацијата на сите сегменти од Доворот може да се создадат услови за норламализација на институциите и одржување на фер и демократски избори во Македонија.
„По изборот на Специјалниот јавен обвинител поставен е темелот, дадена е шанса за постепено враќање на правото и правната држава. Очекуваме сериозен исчекор во однос на постапките за содржината од незаконското прислушување коишто ќе гарантираат владеење на правото за сите, вклучително и за највисоките претставници на власта.“ рече Заев.
Претседателот Заев додаде дека разговорите за лошата состојба во медиумите и за реформите во изборното законодавство треба да резултираат со навремен и квалитетен договор меѓу власта и опозицијата во интерес на граѓаните.
„Реформите во изборното законодавство, избирачкиот список и состојбата во медиумите се следните прашања коишто се клучни за слободни и фер избори, но и за објективно и професионално информирање на граѓаните.“ рече Заев.
На средбата со младите Социјалдемократи од Финска се разменија и мислења за можностите земјава повторно да се врати на патот на евроинтеграциите.