Во днодневна посета на Македонија е норвешката министерка за одбрана, Ан-Грете Стром-Ериксен, која утре ќе присуствува во Центарот за обука „Пепелиште“ на вежбата „Безбедносна патека-2012“.
Министерството за одбрана на чија покана пристигна министерката најави дека на средбата со Фатмир Бесими ќе разговараат за билатералната соработка во областа на одбраната, а и за донацијата на лесно-маневарската полска болница ROLE-2, која официјално ќе биде предадена за време на медицинската вежба „Безбедна патека-2012“.
Кралството Норвешка подолго време е поддржувач на реформите на одбраната во Република Македонија, а воедно е донатор во неколку клучни проекти како што се:прераснувањето на Регионалниот тренинг центар за комуникации во Центар за обука на Партнерството за мир, поддршка на Воено-медицинскиот центар и проектот за ресоцијализација на воен персонал „Лепеза“.
Како што соопшти МО, со поддршка на Кралството Норвешка, Република Македонија исполнува значаен критериум во декларираните единици на земјата за учество во мировни мисии преку развој на подвижната болница од ниво 2. Со исполнувањето на оваа цел, со подвижна болница ќе се организира, опремува и подготвува поддршка за операциите предводени од НАТО.