Германската канцеларка Ангела Меркел денеска изјави дека Договорот за прекин на огнот во Источна Украина не се почитува и оти мора да се вложат напори за целосно спроведување на Договорот постигнат во февруари во Минск.
– Договорот за прекин на огнот не е во целост применет и тоа значи дека има се повеќе жртви, изјави Меркел на заедничката прес-конференција во Берлин со претседателите на Франција и на Украина, Франсоа Оланд и Петро Порошенко.
Меркел истакна дека прв и најважен услов е Договорот за прекин на огнот да стане реалност.
– Тоа што е договорено во Минск мора да се почитува. Овде сме за тој договор да се почитува, а не да се доведува под знак прашалник, истакна Меркел.
Таа упати и апел до западните лидери да ги решат несогласувањата со Русија за Украина, истакнувајќи дека се неопходни контактите со рускиот претседател Владимир Путин.
– Не ја исклучувам можноста за одржување на состанок на четирите страни, наведе Меркел, додавајќи оти постојат разлики во ставовите за решавање на украинската криза.