„Најсовремената и најубавата градинка во Република Македонија, „Кочо Рацин“, ќе биде готова кон крајот на септември. Општина Центар, за прв пат по 40 години, добива ново катче за сместување и воспитување на децата.
Градоначалникот на општина Центар, Андреј Жерновски, беше во обиколка на објектот кој се наоѓа во завршна фаза. Градоначалникот вели дека ова е градинка со која ќе се гордееме сите.
Во неа се вградени најсовремени, еколошки материјали. Фасадата на градинката „Кочо Рацин“ ќе биде енергетски-ефикасна, со тројна термичка заштита, а за првпат во образовна институција во Македонија се поставува кровен противпожарен панел“, се вели во соопштението на Општина Центар.
„За заштита на здравјето и безбедноста на децата и вработените, подовите се анти-алергени, анти-бактериски и со вградено подно греење. Плафонот се обложува со материјал кој го апсорбира нечистиот воздух и бактериите.
Ѕидовите се винилни, а меѓу просториите ќе има и звучна изолација. Кујната што се гради е современа, според ХАСАП стандардите, и ќе произведува 500 оброци дневно за децата од матичната градинка и двата клона.
Децата од Центар ќе добијат градинка каква што заслужуваат, според високите европски критериуми. Изградбата на новата градинка е дел од проектот на општина Центар, „Работно Лето 2015“, пишува во соопштението на Општината.
