Во рамките на „Работно лето 2015“, општина Центар изгради пјацета и детско игралиште на површина од 400 м2, на улицата „Јоаким Крчовски“ на Кале.
„По асфалтирањето на улицата во должина од 200 м2 и реконструкција на тротоарите, општината продолжи со активности во овој дел од Кале. Овој пат, реконструирана е јавна површина меѓу две улици, која претходно беше запуштен простор, обрастен со дива вегетација. Изградена е пјацета, поплочена со бехатон на површина од 350 м2, на која е поставено комбинирано детско игралиште, осум клупи и канти за отпадоци. Реконструиран е и влезот, со поставување на лизгачка порта, а во наредните месеци ќе биде дополнет со летниковец и чешма.
Улицата и просторот беа уредени по средбите што градоначалникот на општина Центар, Андреј Жерновски, ги имаше со жителите на овој дел од градот, како и на сугестија на дипломатските претставници, чии амбасади се наоѓаат токму на улицата „Јоаким Крчовски“.
Стратегија на општината е да се зголемат површините со зеленило и местата за одмор и забава. Во текот на август ќе биде реконструирана и улицата „Наум Наумовски – Борче“, на која исто така, ќе има пјацета со соодветна урбана опрема“, велат од Општина Центар.