Грчката единица за кибер криминал почна истрага за да се утврди дали имало обид да се пробие онлајн системот кој го користи Генералниот секретаријат за јавни приходи, јави дописникот на МИА од Атина.
Главниот обвинител на Првостепениот основен суд Илиас Загораиос му нареди на шефот на одделот за кибер криминал, Манолис Сфакианакис да спроведе истрага. Барањето доаѓа како дел од прелиминарната истрага која се спроведува за да испита евентуална вмешаност на неполитички личности во таканаречениот „План Б“ изготвен од страна на поранешниот министер за финансии Јанис Варуфакис.
Обвинителот побарал истрага од страна на единицата затоа што сака да има две вештачења од различни тела за ова прашање, јавија грчките медиуми.
Во текот на неделата, се очекува да бидат повикани да сведочат и првите сведоци.