Одбојкарската репрезентација на Македонија вечерва (19 часот) во СЦ „Борис Трајковски“ ќе одигра уште еден натпревар против Австрија од Европската лига.
По вчерашните 3:0 нашите одбојкари најавуваат нов триумф.
– Првите два сета ги одигравме феноменално и било која репрезентација, исклучок се првите пет од Европа ќе беше совладана. Имавме околу 5-6 грешки во тие два сета, а кога ќе ги сведеме грешките на минимум лесно е да се игра и противникот тогаш греши. Тоа е рецептот за победа и на вториот дуел со Австрија. Првиот натпревар добро го одработевме, со помош и на „нашата статистика“ точно ја знаевме играта на ривалот, но тоа е веќе минато и немаме право на кикс, изјави капитенот Никола Ѓорѓиев.
Синоќа се одиграа и другите два дуела од групата А. Полска како гостин го победи Израел со 3:0, додека Естонија ја совлада Данска со 3:1 и го потврди првото место во групата и пласманот на завршниот турнир.
Табела А група: Естонија 23 бодови, Полска 15, Македонија 13, Австрија 9, Данска 5, Израел 4.
Македонија и Австрија имаат по натпревар помалку.