„Либерално-демократската партија го поздравува склучувањето на синоќешниот договор за излез од политичката криза во Р. Македонија. Одржувањето на предвремени парламентарни избори на 24-ти април, 2016 година ќе биде ново поглавје за враќање на демократијата во Р. Македонија.
Никола Груевски е детронизиран! Поразот на Груевски ќе биде запечатен со отворање на транспарентна истрага од страна на специјалниот јавен обвинител за содржините, доказите и аргументите од проектот „Вистината за Македонија“. Тоа ќе значи кривична и секаква друга одговорност за сите инволвирани во криминалните активности кои се правеа во изминатиот период под владение на Груевски и неговите послушници. Само така ќе се врати довербата во судскиот систем“, велат од ЛДП.
„Со заминувањето на Груевски завршува ерата на арамилакот, манипулациите, криминалот и изживувањата на режимот врз македонските граѓани.
На Р. Македонија и претстои долг и тежок процес на темелни реформи, рацете на оваа власт ќе мора да се тргнат од сите институции, да се организираат слободни, фер и демократски избори и токму поради тоа потребна е сплотеност и подршката на сите граѓани подеднакво бидејќи никој нема право на монопол врз овие европски вредности. Иднината на Македонија зависи од сите нас.
Ова е победа на македонскиот народ, за европска Македонија“, соопштуваат од ЛДП.