Бразилецот Хуан Фелипе Алвес Рибеиро е ново засилување во редовите на македонскиот шампион Вардар. Фудбалерот од Бразил потпиша договор со важност од една година и веќе се приклучи во базата на подготовките на Вардар во австриски Бад Татцмансдорф и го одржа првиот тренинг со екипата.
Фелипе е роден 1987 година и кариерата ја почнал во повеќекратниот бразилски шампион Сантос, а има настапувано и за неколку други екипи од Бразил. Ланската сезона беше дел од ЦСКА Софија и е играч кој игра во средината на теренот во офанзивниот дел.
– Феноменални услови ми понудија од Вардар и ги прифатив. Амбициите на клубот се големи и по можност да се стигне што подалеку во Лигата на шампионите, а во Македонија да ги освои сите три круни, изјави за официјалната интернет страна на клубот Фелипе.
Бразилецот е шестото засилување во Вардар по Филип Гачевски, Дарко Велковски, Ацо Стојков, Бобан Николов и Владица Брдаровски. На пробра во Вардар се наоѓаат уште двајца играчи.