Нема вода за пиење во селото Манастирец росоманско поради лизгање на земјиште во местото „Турски рид”, при што е оштетен цевковод во должина од 300 метри, информираше денеска Стојанче Лазов, градоначалник на општина Росоман.
– Лизгањето на земјиштето помеѓу росоманските села Манастирец и Рибарци дојде како последица на обилните дождови во изминатиот период. Сокршени се дел од цевките од цевководот, појасни градначалникот.
Тој соопшти дека во тек е постапка за јавна набавка од итен карактер со која се обезбедуваат црева за водоводот со кој се носи вода за пиење.
– Цревата се веќе порачани, од страна на јавното претпријатие „Комуналец” од нашата општина се работи на ископ на терен и очекувам до крајот на оваа седмица проблемот да биде надминат,нагласи Лазов.
До санирање на дефектот манастирчани со вода за пиење се снабдуваат од селската чешма, а за други потреби на располагање им е технолошката вода од хидромелиоративниот систем „Тиквеш”.