Министерството за транспорт и врски реагира на текстот „Deal oriented“ – Новиот министер за транспорт ќе дава поклони на состаноците, во кој се вели дека новиот министер за транспорт и врски Владо Мисајловски на деловните состаноци ќе подарува ракотворби од месинг или луксузна монографија на македонски и англиски јазик.
Целата реакција:
Сакаме да потенцираме дека се работи за сукцесивна набавка која се реализира согласно потребите на Министерството, истата се реализира тековно секоја година и е предвидена во годишниот план за јавни набавки.
За Ваше информирање, ваквиот тип на набавки се потребни за билатерални средби како и за неформални средби кои ги остварува министерот, заменик министерот, државниот секретар како и државните советници во Министерството за транспорт и врски во рамките на своите работните обврски во комуникацијата со дипломати и други соработници кои се директно инволвирани во проектите што се реализираат преку ресорот транспорт и врски.
Оттука не гледаме ништо спорно во предметот на Договорот за јавна набавка, за истиот од Ваша страна да биде тенденциозно објавен со намера да се претстави како начин на несовесно и недомаќинско работење во Министерството.
Ве потсетуваме дека при информирањето на јавноста основно начело претставува почитување на вистината и правото на јавноста да биде информирана во согласност со Уставот на Република Македонија, од тие причини, бараме оваа реакција согласно новинарската етика да биде објавена.
Министерство за транспорт и врски