Папамобилот кој ќе го користи папата Франциск за време на апостолската посета на Сараево на 6 јуни под мотото „Мир со вас“, денеска со брод пристигна во Сплит.
Како што јавуваат хрватските медиуми, папамобилот е пренесен од Анкона во Сплит со редовната линија на бродот „Марко Поло“, а оттаму ќе биде пренесен во Сараево.
Станува збор за возило „мерцедес г 500“, произведен во 2007 година. Возилото го користел папата Бенедикт Шеснаесетти за време на церемонијата на плоштадот Свети Петар во Рим.
Папамобилот е неофицијален назив за специјално конструиран автомобил што поглаварот на римокатоличката црква го користи за време на своите службени посети.
По обидот за атентат на папата Јован Павле Втори, на 13 мај 1981 година, папамобилот е доопремен со панцирно стакло.
Извор: Мета