Имам многу пријатели што заминаа на различни страни во светот и тие секојдневно ме ме прашуваат зошто останувам во Македонија, во оваа трула држава, а јас им одговарам дека не си одам од Македонија бидејќи сум горда на прекрасните критички настроени луѓе околу мене, кои во последните месеци се разбудија и бидејќи сум горда на преродбата што ни се случува, вака Румена Бужаровска, професорка на УКИМ го започна своето обраќање во кампот на Граѓаните за Македонија пред Владата.
Таа нагласи дека е горда на македонските студенти кои ја почнаа преродбата и им ги отворија очите на многу луѓ за неправдите што се случуваат секојдневно.
– Горда сум и на активистите борци за граѓански права кои со години протестираат и покрај сите тортури одкои некои се и и физички. Горда сум на жените што не дозволија женското тело да биде инкубатор на овој режим, што застанаа како жив штит да ги бранат полицајците од хулиганите. Горда сум на новинарите што многу претрпеа сите овие години а сепак продолжија да работат професионално, горда сум и на нашите уметници што во вакви услови создаваат дела што ќе бидат запаметени во нашата култура. Горда сум и на интелектуалците, што конечно некои од нив излегоа од своите комфорни зони.
А најмногу од се’ ме гордее тоа што покажавме зрелост и ги надминавме религиозните и етничките бариери што ни беа вештачки поставени.
Фала, Никола што ни овозможи да доживееме ренесанса – парадоксално, во најголемиот режимски мрак што сме го доживеале. Ваква сплотеност не сме имале досега.
Јас не си одам од Македонија, Никола треба да си оди, ама прво да си ги измири сметките со нас, нека си одат од оваа стиропорна палата што изгледа како инфатилен сон на некој што не излегол подалеку од својот двор.
Нека си одат и нека не’ остават да живееме убаво, затоа што Македонија доживува преродба во овој момент, рече Бужаровска.