Левичарското движење „Солидарност“ се огласи со соопштение, во кое повикува заедно и солидарно да се стапи на страна на слободата
Еве што стои во Манифестот на „Солидарност“:
„Приклучете се на народните протести кои добиваат сè поголема поддршка ширум цела Македонија! Сплотени и солидарни како никогаш до сега, угнетените го кренаа гласот против оваа одчовечена власт! Тој глас е веќе ослободен и ечи по улиците, го навестува новото време на правда и еднаквост, слобода и солидарност, вредности кои ќе ги вратиме и втемелиме во секоја пора на нашето општество!
Ние никогаш не прифативме и нема да прифатиме ниедна форма на неправда! Со години, заедно со работничките и работниците, студентите и студентките, невработените, новинарките и новинарите и сите други обесправени стоевме на браникот на правдата и слободата. Народното движење кое со години растеше истрајно и самостојно, на 5-ти мај кулминираше во масовен народен бунт.
Овој ден, 5-ти мај, веќе претставува почеток на новото време, од овој ден па натаму во Македонија сè ќе биде различно!
Почитувани СОБОРКИ И СОБОРЦИ! Се наоѓаме пред големи чекори, и затоа мораме заедно да ги градиме нашите идни чекори, да го поставиме планот за новото општество!
Активистите и активистките на Левичарското движење СОЛИДАРНОСТ, како дел од автентичниот народен глас, стоејќи цврсто убедени во исправноста на народната борба за слобода и правда, ги поставуваат следниве барања:
Итна оставка на Владата на Република Македонија предводена од Премиерот Никола Груевски;
2. Ослободување на сите политички затвореници, вклучително и приведените по настаните на 5-ти мај;
3. Формирање на Влада на Национален Спас која во најкус можен рок ќе го направи следново:
– Именување нови раководни лица во полицијата и обвинителството;
– Прочистување на избирачкиот список и организирање на фер и демократски изборен процес.
Борбата за демократска и социјално праведна Македонија продолжува!