Илјадници демонстранти дојдоа се пред Собранието, откако попладнево беа повторно спречени да протестираат пред Влада, тие отидоа пред Министерството за внатершни работи, а потоа и пред зградата во која живее Груевски, каде им побараа оставки.
Насекаде беа пречекани од кордони полиција и специјалци. И пред Собранието е поставено силно полициско обезбедување.
На протестот пред Собранието се скандира „Оставка, оставка“, а кон полицијата се упатуваат прашања „Имате ли вие деца“ и „Кого браните?“ Активстите на полицијата им го покажуваат Уставот во кој се гарантира слобода на движење и слобода на протестирање.
Протестот е мирен, а го следат голем број домашни новинарски екипи, како и медиуми од странство.
Новинарот Огнен Јаневски им порача на граѓаните да се информираат за следните протести преку фејсбук групата Стоп за полициска бруталност и да даваат предлози за следните активности. Тој уште еднаш побара оставки од Груевски, Јанкуловска и Мијалков.
– Оставки од оние кои ја урнаа македонската демократија. Нема да замолчиме и да си одиме, ако замолчиме и ние ќе станеме соучесници. Да не го дозволиме тоа, рече тој.