Грчкиот министер за финансии Јанис Варуфакис денеска изјави дека тој и неговата жена биле нападнати од анархисти додека вечерале во еден ресторан во центарот на Атина, но дека не се повредени.
Според грчкиот министер, двајцата синоќа вечерале со пријатели во атинскиот кварт Егзархија, популарен меѓу екстремните левичари и анархисти, кога маскирана група упаднала во ресторанот, пренесува Танјуг.
Групата барала министерот да ја напушти областа, фрлајќи стаклени шишиња и останати предмети врз него и неговата жена, истакна Варуфакис, додавајќи дека тие не биле повредени.
Варуфакис истакна дека неговата жена го прегрнала и заштитила кога еден од групата се обидел да го удри. – Ова не беше организиран инцидент, истакнува Варуфакис во соопштението.
На крајот министерот разговарал со групата пред ресторанот и тензиите биле смирени.