По повод 29 април – Денот на основањето на Кинотека на Македонија денеска ќе биде доделена традиционалната награда „Златен објектив“ за исклучителен придонес во македонската кинематографија.
Добитник на наградата е доајенот на македонската филмска камера –директорот на фотографија Драган Салковски, еден од најреномираните и најеминентни македонски филмски сниматели.
Драган Салковски со филмска дејност професионално се занимава од 1959 година. Од 1969 до 1997 година работи во продуцентската куќа „Вардар филм“ – Скопје.
Покрај својата снимателска дејност, во сферата на македонскиот документарен филм соработува и во реализацијата на десетина играни филмови во продукција на „Вардар филм“ и во уште толку во странска продукција. Добитник е на повеќе награди и признанија, меѓу кои: Златна плакета за најдобра камера за филмот „Јазол“ на Фестивалот на филмската камера „Браќа Манаки“ во Битола (1985), додека филмовите „Тулгеш“ и „Ликвидатор“ во чијашто реализација учествува, се добитници на Гран при на Фестивалот на документарен и кусометражен филм во Белград.