Меѓународното училиште „Нова“ викендов организираше семеен базар и собра 3.700 евра од кои дел ќе бидат наменети за Заводот за ментално здравје на деца и младинци „Младост“ – Здравствен дом Скопје.
Стотици луѓе ја посетија хуманитарната манифестација која годинава се одржа по деветти пат, а мотото на настанот беше „Еднакви можности за сите деца“.
На базарот учествуваа семејствата на учениците од меѓународното училиште „Нова“, нивни гости, припадници на бизнис-заедницата од Македонија, амбасадори и членови на дипломатскиот кор кои живеат и работат во земјава. Тие подготвуваа јадења, продаваа сувенири од своите матични држави и донираа подароци за лотаријата. На манифестацијата имаше и мини зоолошка градина, можеа да се купат книги на англиски јазик и да се погледнат музички и танцови точки на учениците од оваа образовна институција.
Како што соопштија денеска од НОВА, собраните средства секоја година се наменуваат во хуманитарни цели, а дел се користат за активностите на училиштето. Минатата година средствата биле донирани за Домот за доенчиња во Битола, а овој пат за Заводот за ментално здравје на деца и младинци „Младост“. Парите ќе се искористат за набавка на дидактички материјали и опрема неопходна за работа.
Хуманитарниот базар беше организиран од Здружението на родители и наставници при меѓународното училиште, со поддршка од учениците, родителите и професорите во оваа образовна институција.