Грчките финансиски резереви се поголеми од она што досега се мислеше, објави германскиот весник „Зидојче цајтунг“, нагласувајќи дека според извори од преговорите меѓу Атина и ЕУ, Грција може да остане платежно способна до 12 мај.
– Ваквите податоци во Брисел ги изнеле грчките преговарачи, наведува весникот, потсетувајќи дека досега се говореше дека 9 април е „денот по кој на Грција итно ќе и биде потребна дополнителна помош“.
„Зидојче Цајтинг“ нагласува дека за да добие дополнителни пари Атина мора да подготви „список на конкретни мерливи реформи“. – Меѓутоа, напорите во таа сфера напредуваат бавно, додава весникот.
Весникот „Велт“ пак оценува дека во Европа се повеќе се добива впечаток дека Атина сака да добие пари без да спроведе реформи.
– Меѓу Европејците преовладува стравување дека грчката Влада ќе ја искористи дополнителната помош за зголемување на платите, пензиите и социјалните трошоци, наведува весникот, додавајќи дека останува отворено прашањето дали и кога Грција ќе сака да ги врати парите што и беа позајмени.