Во поширокиот велешки регион изминатата година имало осум заболени од туберкулоза, покажуваат податоците на Антитуберкулозниот диспанзер, кој работи во рамки на ЈЗУ Општа болница Велес.
Убавка Јаневска, пнеумофтизиолог од Антитуберкулозниот диспанзер во Велес, изјави дека споредено со 2013 година кога имало 13 болни од туберкулоза, може да се заклучи дека бројот на заболени е во драстично опаѓање. Таа посочи дека во првите три месеци од годинава во Велес и велешко е регистриран само еден новозаболен од туберкулоза, кој веќе успешно се лекува.
Воедно информира дека редовно добиваат бесплатни лекови од Глобалниот фонд за борба против ХИВ/СИДА, туберкулоза и маларија, а со подршка и заложба на Министерството за здравство со кое, како што посочува, имаат одлична и континуирана соработка за превенција на болеста и успешно лекување на болните.
– Сепак навременото лекување и континуираното следење на состојбата на болните во текот на целата болест многу придонесува бројот на заболени да се сведе на минимум, додаде Јаневска.