Лидерот на Курдската работничка партија (ПКК) Абдула Оџалан денеска, по повод курдската Нова Година – Невруз, го повтори повикот за завршување на курдската вооружена борба, што е почната уште од 1984 година против турските власти, и го прогласи почетокот на „новата ера“ на мир, соопштија француските медиуми.
Во пораката, што беше прочитена пред повеќе од 200 000 лица во Дијарбекир, во јуоисточна Турција, Оџалан, кој се наоѓа на издржување на доживотната затворска казна, ја изрази желбата за организирање конгрес на ПКК „за завршување на вооружената борба“. Оџалан во пораката посочува дека со овој конгрес ќе почне новата ера.
„По периодот на борби ние навлегуваме во процес на мир“, се забележува во текстот, цитиран од турската телевизија НТВ.
Пораката на Оџалан беше прочитана на курдски и турски јазик од заменик претседателката на прокурдската Демократска партија на народите, Первин Булдан, и од пратеникот од оваа партија Сера Суреја Јондер.