Убавото време и прекрасната атмосфера измамија денеска многу центарци, но и граѓани од цело Скопје да дојдат и да го минат претпладнето, дружејќи се во кафеаните на Боемската улица.
Трите угостителски објекти беа преполни, а сопствениците не го криеја задоволството, бидејќи по комплетната реконструкција на улицата Ѓорѓи Пешков и делот на Михаил Цоков, посетеноста и заработувачката неколкукратно е зголемена.
Од понеделник – уште една убава вест за граѓаните кои ќе посакаат денот и вечерта да ги минат не само во овие три, туку во сите тринаесет кафеани кои што се наоѓаат на потегот од Боемска, преку кужниот тек кај Идадија, се’ до влезот на градежниот факултет.
Од овој, па секој нареден понеделник, попустот на целото мени ќе биде 20%. Со ова треба да заживеат уште повеќе кафеаните во овој дел на Центар. Затоа годинава ќе се реализира и комплетниот проект “Боемски кварт“. Целиот потег ќе биде реконструиран со истиот квалитет како и улицата Ѓорги Пешков, а 4 пати годишно – општината и угостителите ќе ги организираат “Боемските Дебармаалски Денови“ со познати тамбураши, далматински клапи и староградска македонска музика.