На подрачјето на општините Куманово, Липково и Старо Нагоричане, изминатите седум дена се пријавени 183 новозаболени од грип, што е зголемување за 30 отсто во однос на минатата недела, информираа денеска од Центарот за јавно здравје Куманово.
Кумановските епидемиолози истакнаа дека вкупниот број заболени од грип од почетокот на сезонава, досега, изнесува 1.511, што е за 20 отсто повеќе во однос на истиот период минатата година.
– Повеќето заболени или приближно 69 отсто од пријавените се на возраст од 15 до 64 години. Следува возрасната група од 5 до 14 години или 17 отсто, над 65 години се осум отсто и деца до четиригодишна возраст се 4,5 отсто, посочи доктор Едита Рамизи, епидемиолог од Центарот за јавно здравје Куманово.
На инфективното одделение во Општата болница Куманово во февруари, заклучно со седмата недела, хоспитализирани се 14 лица. Епидемиолозите очекуваат тренд на пораст на заболени и во наредните недели со варијации во интензитетот.