Министерот за транспорт и врски, Миле Јанакиески, со решение се оглушува на барањата на граѓаните, како и на ставот на градоначалникот на општина Центар, Андреј Жерновски да не се гради катна гаража кај Автомакедонија, велат од Општина Центар.
„Државниот управен инспекторат го задолжува Жерновски да постапи по решението на министерот, кој пак му дава право на тужба до Управен суд во рок од 30 дена. Со ова, сите надлежни државни органи се ставија во служба на инвеститорот „Никофон“.
Управна инспекција осум пати доаѓаше во општина Центар, да интервенира за да се создадат сите услови како би почнала градбата“, соопштуваат од Општина Центар.
„Осум ургенции за еден предмет е незапамтено. Во текот на постапката, Дирекцијата за заштита и спасување два пати издаде негативно мислење за проектот, бидејќи не беа исполнети стандардите за заштита при пожари и евакуација на населението.
За да се излезе во пресрет на „Никофон“, директорот на Дирекцијата за заштита и спасување го менува правилникот, ги укинува одредбите кои „Никофон“ не ги исполнува, дава позитивно мислење по основ на проектот и веднаш потоа го враќа правилникот во првобитна состојба.
Околните жители се револтирани и велат дека осум-катна гаража која ќе биде висока 25 метри воопшто не им е потребна, бидејќи веќе има една само на неколку метри оддалеченост“, велат од Општината.
„Бараме зеленило, а не гаражи на секој чекор. Каде е нашиот интерес и барања како непосредни соседи? Не може министерот да носи одлука која задоволува само нечии бизнис интереси“, велат незадоволните граѓани.
Претходното раководство на општина Центар го продаде земјиштето на „Никофон“ за изградба на катна гаража.