Мнозинството во Советот на Општина Центар изгласа градоначалникот Андреј Жерновски заедно со пратеници од ВМРО-ДПМНЕ и СДСМ да побараат средба со премиерот Никола Груевски за да добијат одговор зошто една година од поднесеното барање владата молчи за доделување на градежното земјиште на општината.
Советничката група на ВМРО-ДПМНЕ не гледа потреба од делегација кај премиерот.
„Не гледам причина зошто да одиме кај премиерот, ни помалку ни повеќе туку кај премиерот. Ќе разберев ако беше за кај министерот за транспорт и врски, ама кај премиерот не можам да разберам“, рече советничка од ВМРО-ДПМНЕ.
„Зошто се плашите да одиме кај премиерот, мислите дека ќе бидете снимени“, праша советникот Дарко Атансовски од СДСМ.
Жерновски и појасни дека од транспорт и врски биле упатени дека за ова одлучува владата а не министерството.
„Јасно е зошто немаме никаков одговор од владата и зошто не ни дадено земјиштето во владение. Премиерот ќе го прашаме зошто владата упорно ја игнорира општина Центар и дали воопшто има намера да го врати земјиштето. Од утре ќе побарам прием кај премиерот“, рече градоначалникот Жерновски.
Советниците од ВМРО-ДПМНЕ прашаа зошто не добиваат одговор на советничките прашања и дали Жерновски знае да располага со земјиштето.
„На половина од вашиот мандат моравме да носиме одлука за да го спасиме кредитот за катната гаража кај Нова Македонија“, рече советникот Сашо Трпевски.
Жерновски посочи дека заложба на општината е не да гради катни гаражи, туку училишта и градинки. Во Општината 13 години нема направено нова градинка, а таа беше ветувана од неговите претходници. Посочи дека владата не го враќа земјиштето на Општина Центар за да може да се раскрчмува и продава за багателна цена градежното земјиште.