Дваесет години од дипломатските односи меѓу Македонија и Израел оваа година ќе бидат одбележани со повеќе содржини. За планираните настани со кои ќе се претстават двете култури денеска разговараа министерката за култура Елизабета Канческа–Милевска и израелскиот амбасадор Дан Ориан на средба во Министерството за култура.
Битолскиот театар со претставата „Среќен крај“ ќе гостува во повеќе градови во Израел, а во Тел Авив е предвиден концерт на Скопскиот дувачки квинтет. На крајот на март во Македонскиот народен театар ќе се претстави танцувачката театарска група „Инбал пинто“ и „Авсхалом полак“ од Тел Авив со претставата „Ојстер“ која ќе биде најава за второто издание на Меѓународниот театарски фестивал „МНТ-фест“.
– Двајцата соговорници на средбата ги истакнаа добрите културни врски што ги негуваат Израел и Република Македонија и големиот број проекти од сите дејности на културата. Министерката нагласи дека во капиталните проекти „Ѕвезди на светската книжевност“ и „Превод на дела на добитници на Нобелова награда за литература“, застапени се автори од Израел или дела на хебрејски јазик, а и во проектот „Антологија на светската поезија“ ќе бидат презентирани и преводи на познати поетски дела на хебрејски јазик, соопшти Министерството за култура.
Минатата година Министерството за култура го поддржа издавањето на книгата за деца „Кога тато ќе порасне“, чиј автор е токму амбасадорот Ориан. Се работи за македонско и албанско издание кое ќе биде промовирано в четврток во Друштвото на писателите на Македонија, а профитот ќе биде наменет за болни деца.
Во 2005 година беше потпишана Програма за соработка во областа на културата, образованието и науката меѓу Владата на Република Македонија и Владата на Државата Израел. Министерството информира дека е иницирано нејзино обновување за уште повеќе да се продлабочат културните врски меѓу двете земји.