ВМРО-ДПМНЕ повторно го повикува Петре Шилегов од СДСМ јавно да одговори на прашањата за фирмите во неговиот стан, за закупнината што ја добива од непостоечки имот, за златото, накитот и часовниците со кои располага, вредни 130.000 евра, за уметничките слики што ги купил 50.000 евра со приход кој до скоро го пријавувал на 33.000 денари,…
– Шилегов десет дена молчи за скандалите во кои е заглавен до гуша, а претходно секој ден излегуваше на пресови за секакви квази скандали. Која ставка и да се погледне од неговиот анкетен лист, се поставува ново прашање и нов скандал, рече денеска на прес-конференција пратеникот Александар Стојкоски.
Според него, Шилегов не најде начин да одговори како месечно добива закупнина од 700 евра од непостоечки имот, премолчи и за четирите фирми сместени во неговиот стан за кои не пријавил дека има договор за закуп, ниту колку закупнина добива од нив, а не кажа и со што се занимаваат две од четирите фирми кираџии кои немаат пријавено вработени и по се личат на фантом фирми.
– Шилегов за ниту еден од овие скандали не излезе да даде одговор на јавноста. Тоа е крајно дрско, но истовремено и сомнително. По урнекот на Шекеринска и Заев за своите скандали молчи и се обидува да се скрие преку манипулации за други. Ова е вистината за Петре Шилегов, за неговите сомнителни зделки, скриени приходи и лажни податоци за имотната состојба и приходите. Паднаа маските и лицемерието кое го продаваше во јавноста. Сите видоа колку матни зделки се врзани за него, посочи Стојкоски.