Правото на штрајк е загарантирано со Уставот на Република Македонија. Со опструирање на правото на штрајк не само што власта го гази Уставот на Република Македонија туку се газат и загарантираните права на работниците според Конвенциите на Меѓународната организација на трудот, чијашто потписничка е земјава, вели Мила Царовска, претседателка на Комисија за социјална политика на СДСМ.
Директорите на училиштата немаат никакво право да нарачуваат списоци со наставници кои го остваруваат легитимното право на штрајк за заштита на своите права. Немаат право ниту да наложуваат на наставниците да одржуваат настава, за време на штрајк.
Со кое право градоначалниците од ВМРО-ДПМНЕ се редат како на филмска лента за да кажат дека настава ќе има, што е дополнителен притисок врз наставниците?
Власта на Никола Груевски, исплашена од кулминација на огромното незадоволство во образованието, направи противуставни законски измени за замени на наставници во време на штрајк, мислејќи дека на тој начин ќе се заштити.
Бидејќи оваа власт не знае ни Д од дијалог, прашање на време беше кога ќе стане јасно дека наставниците се изиграни, а власта ниту има намера да им ги покачи платите, ниту пак имаат намера да ги укинат казните што ги воведоа преку екстерното тестирање.
Хаосот во образованието, преоптовареноста на наставниците со непотребна администрација и експериментите во обемната настава, големиот број казни преку коишто се полни буџетот, општата лоша економска ситуација во земјава ги натера наставниците да си ги бараат своите права.
Ниту едни измени на закон, списоци, послушни градоначалници и директори не ќе можат да ја заштитат власта.
Свеста на луѓето се разбуди. Назад нема.
Владата на СДСМ секогаш ќе го поттикнува социјалниот дијалог кој треба да биде барање на решение на двајца рамноправни партнери а не еднострано прифаќање на барања.
Зголемување на платите во Република Македонија и нивно усогласување со трошоците за живот е потребно, не само во образованието туку во сите сектори, затоа што сме на дното од Европа и со висината на платите и со стандардот.
СДСМ се залага за инвестиции во човечкиот потенцијал, а не во згради, бронза и мермер, како што прави оваа власт со проектот Скопје 2014.