МВР откри 18 илегални мигранти во четири одделни случаи на криумчарење во изминатите денови, при што против шест лица, од кои и двајца грчки државјани, до надлежното основно јавно обвинителство поднесе кривични пријави поради постоење основано сомнение за кривично дело “криумчарење мигранти“.
Од 18 илегални мигранти, на возраст од 21 до 37 години, петмина се од Сомалија, деветмина од Сирија, тројца од Ирак и една албанска државјанка.
Во првиот случај кривично е пријавен В.С. (42) од Гевгелија кому судија од претходна постапка му одреди мерка притвор во траење од осум дена. Пријавениот во возило Mitsubisni Spacestar“ со скопски регистарски таблички превезувал седум илегални мигранти, пет од Сомалија и двајца од Сирија со намера да ги пренесе кон северната граница, но бил сопрен од полицијата во близина на село Градец на автопатот Е-75 од Гевгелија кон Скопје.
Во вториот случај кривично се пријавени Х.И. (40) од село Желино и Џ.И. (52) од село Јажинце, тетовско, за кои судија од претходна постапка одреди мерка притвор во траење од по осум дена. Полицајци од ПС „Рогачево“ ги забележале како во близина на месноста викана „Извори“ илегално ја преминуваат државната граница од Косово кон Македонија. Биле сопрени во близина на село Јажинце кога е откриено дека во возилото со кои се превезувале има и уште едно лице, Х.А. (18) албанска државјанка, за кој по проверките е констатирано дека имала активна мерка „забрана за влез во РМ”, затоа што таа претходно е приведена на 30.12.2014 година во УО „Кораби” како танчерка. Таа со помош на Џ.И. илегално ја преминала државната граница, а од извршениот преглед врз пријавените и на возилото кај Х.И. биле пронајдени 58.000 денари и 1.970 евра.
Во третиот случај кривично се пријавени грчките државјани Г.Е. (47) и Д.Г. (26) за кои исто така Судија од претходна постапка им одреди мерка притвор во траење од по осум дена. тие со две возила комбе „опел зафира“ (управувано од Г.Е.) и „шкода рапид“ (управувани од Д.Г.) се сопрени од полицијата во близина на село Прдејци и при прегледот е констатирано дека во првото возило биле сместени четворица илегални мигранти од Сирија, додека во второто возило тројца државјани на Сирија, кои што од нивна страна биле пречекани во близина на село Мрзенци со намера да бидат пренесени кон северната граница.
Во четвртиот случај кривично е пријавен К.П. (31) од Битола. Тој завчера (17.01.) во 18:40 часот бил сопрен одсообраќајна полиција на излез од Битола во населбата Горно Оризари и притоа во неговото возило „опел вектра“ откриени се тројца илегални мигранти од Ирак кои за надомест од по 80 евра требало да ги пренесе од Битола до Скопје. Судија од претходна постапка и нему му одреди мерка притвор во траење од осум дена.