Германскиот производител БМВ четири години по претставувањето на втората генерација на Серија 1 изврши редизајн на моделот.
Значителни стилски промени има на предниот и задниот дел на возилото, како и промени во понудата на мотори, меѓу кои се најде и трицилиндерски бензински и дизел агрегати.
БМВ ги „освежи“ двата модели со три и пет врати, а прв впечаток е дека возилото сега изгледа посовремено. Интервенции има во предната светлосна група, маската на ладилникот и предниот браник.
ЛЕД дневни светала од 2015 година ќе бидат стандардна опрема, а како опција може да се добие целосна предна светлосна група со ЛЕД технолпогија.
БМВ Серија 1 во внатрешноста доби изменет дизајн на командите за радио и клима уред, екранот на мултимидијалниот систем и уште неколку украсни детали.
Основен модел во понудата е бензинскиот БМВ 116и со 1,5 литарски трицилиндерски мотор со 109 коњски сили. Дизелот 116д со 1,5 литарски трицилиндерски мотор испорачува 116 коњски сили.
Во понудата на мотори се наоѓаат и 1,6 литарски бензински мотор со 136 коњски сили и 177 коњски сили, како и 2,0 литарски бензински мотор со 218 коњски сили. Од дизел моторите, во понуда е 2,0 литарски мотор со 150 коњски сили и 190 коњски. Најмоќниот дволитарски дизел мотор испорачува 224 коњски сили.
Моделот БМВ Серија 1 М135и доаѓа со 3,0 литарски шестцилиндерски бензински мотор со 326 коњски сили и осумстепен автоматски менувач. Тоа е доволно за забрзување од 0 до 100 километри на час за 4,9 секунди.
БМВ Серија 1 хДрајв со погон на сите четири тркала е достапен само со автоматски менувач. Серија 1 за 2015 година ќе биде премиерно претставен на Саемот во Женева на почетокот на март, кога ќе бидат познати и цените.