Со почетокот на снежните врнежи денеска на терен активно работи зимската служба, соопштија од Град Скопје. Машините ќе интервенираат по потреба за расчистување на снегот и фрлање сол на булеварите и собирните улици кои се во надлежност на Градот.
– За претстојната зима Град Скопје има на располагање 2.300 тони индустриска сол како залиха од лани, и дополнителни 1.500 тони набавени годинва. Зимската служба на располагање има 30 возила од ЈП „Улици и патишта“, како и возила што дополнително се ангажирани од приватна фирма, информираат од Градот.
Екипите на зимската служба ќе дежураат во текот на 24 часа на две локации, на пунктот на ЈП „Улици и патишта“ во Кисела Вода и на пунктот во Бутел.
Од Градот апелираат до сите учесници во сообраќајот да возат внимателно и да се прилагодат на условите на теренот.