Професорите го кренаа својот глас и јасно кажаа „не“ за носење на измените во Законот за високо образование. Ова според нив е лош закон кој што ги собра и обедини во Професорски Пленум, за кој велат дека е конструктивна работа и доаѓа како резултат на предолгиот мир и неактивност.
„Ние треба да бидеме креатори на политиките и законите, ние треба да им нудиме на властите промени. Ова неформално собирање не е сплеткарство“, рече универзитетскиот професор, Огнен Чемерски.
Професорите, вели, имаат и етичка одговорност да не ги спроведуваат лошите закони.
Професорскиот Пленум доби писма со поддршка од над 100-тина интелектуалци и мислители и испрати писмо до Собранието.
„Веќе е воспоставена конструктивна комуникација и ние во иднина ќе бидеме двигатели на промените и нема да дозволиме да се усвои ваков неук и штур наметнат начин на промени. Доколку власта нема слух, ќе спроведеме граѓанска непослушност и ќе одбиеме да се спроведува Законот“, изјави Чемерски.
Професорот Игор Јовановски рече дека студентите им одржале лекција.
„Време беше да излеземе од топлите кабинети и спалните. и да се организираме во пленум“, рече Јовановски.
Поддршка дадоа и професорите Емин Сулејмани и Бујар Саити.
„Зошто излегов денеска? Навистина демократијата се учи. Веројатно сте чуле дека пред половина час Ректорската управа го препознала професорот во себе, а можеби и по нашето обраќање и донеле одлука потпишана од сите декани дека веднаш ќе бараат повлекување на Законот од Собранието“, рече професорот Гордана Сиљановска.