Израелската полиција синоќа уапси уште осум еврејски активисти од екстремистичката група Лехава, која се спротиставува на арапско-еврејската коегзистенција, изјави портпаролот на полицијата Луба Самри.
Тоа е второ апсење на припадниците на Лехава во рок од една недела. Осомничените се уапсени во серија рации во централен и јужен Израел и во окупираниот Западен Брег.
Лехава пред се е против мешаните бракови, а вмешана е и во подметнувањето на пожар во еврејско-арапското училиште минатиот месец.
Во одвоен инцидент во парк во Ерусалим уапсени се петмина млади Евреи, од кои четворица малолетни. Тие носеле воени знамиња, шрафцигери и собирале камења за да ги нападнат Арапите.
Минатиот вторник израелската полиција уапси 10 членови на Лехава, меѓу кои и лидерот Бенци Гопштајн, кој живее во еврејската населба во поделениот град Хеброн во Западен Брег. Гопштајн и уште двајца во петокот се пуштени во домашен притвор, а останатите се условно ослободени.
Активистите на Лехава го следат учењето на починатиот рабин Меир Кахане, кој остро се спротиставуваше на Арапите и чија партија Ках беше забранета во 1994 година, откако еден од членовите уби 29 муслимани во џамија во Хеброн.