Жител на струшкото село Велешта добил повеќе прострелни рани откако во него со огнено оружје пукало непознато лице.
Како што информира портпарлот на СВР Охрид Стефан Димоски, инцидентот се случил ноќеска, кога 36-годишниот А.С. со својот автомобил се враќал дома.
– Во близина на неговата куќа било паркирано возило „Ровер“ од кое излегле две лица. Едното од нив испукало повеќе куршуми кон А.С.и му задало прострелни рани во стомакот, грбот и екстремитетите,по што двете лица се вдале во бегство, вели Димоски.
Повредениот е пренесен во Општата болница во Струга и врз него бил извршен оперативен зафат, по што се наоѓа во стабилна состојба.
Напаѓачите избегале од местото каде во криминалистичко-техничкиот увид се пронајдени осум чаури, еден проектил и еден дел од проектил. Полицијата работи на расветлување на случајот и трага по сторителот на кривичното дело „Убиство во обид“.